Chandrakant Devtale ke kavya me samajik chetna

Abstract

Samajik Chetna manav ko manushyata ke path par anvarat chalte rahne aur doosron ko bhi us marg ka anusaran karne ki prerna dene vala ek kushal madhyam hai. Sahitya ka mukhya karm samaj ki vibhin pravritiyon ko yatharth roop mein abhivyakt kar manushya ke sarvangeen vikas mein sahayak hona hai. Chandrakant Devtale samaj mein vyapt arthik vishamta, asmanta, jativad, rajnitik bhrashtachar, sampradayikta, poonjivadi vyavstha ke khilaf janmat sangrah khada karne mein nishchit taur par safal rahe hain, jisse samajik chetna ka vikas hua hai. Chandrkant Devtale ki kavita mein samay aur sandarbh ke sath talluk rakhne vali sabhi samajik, rajnitik, sanskritik pravritiyan sma gai hain. Unki kavitaon mein jivan ke prati ek aho bhav dikhai deta hai, jo hamein sangharshon se ladna sikhata hai. Unhone jivan roopi virat falak par samajik jivan ki anubhootiyon ke yatharth roop ko chitrit kiya hai. Unhone manviya rishton evam samajik sarokaron ke gahre pakshon ko apni kavita mein vishisht shaili mein likha hai. Unhone samaj mein vyapt bhrashtachar, rajnitik swarth, vyaktigat swarth aur dharmik andhvishvas ka yatharth chitran kiya hai. Unka rachna sansar sidhe taur par samajik jivan ke sath juda hua hai. Smajik chetna Unke sahitya ka mool swar hai. newline