Dayananda rgbhssya ke nirvacanom ka vyakaranasastriya adhyayana caturtha se saptama mandala ke sandarbha mem

Abstract

Samast pracheen bharateeya granth muktakanth se vedon ka mahima-mandan karte hain. Unki upadeyata ke karan vedaavirbhavkaal se hi vedadhyayan aarambh ho gaya tha, kintu vedbhashya ya vedarth ki parampara ka upakram tab hua jab logon ko maulik upadesh dwara vedarth gyan me asamarthya anubhav hone laga. Anekon aacharyon ne apni-apni drishti anusar vedarth kiya aur vedvishay me anek bhashya hue.Dayanand ne paramarthik ke sath hi vedmantron ki vyavaharik vyakhya bhi prastut ki. Is shodhprabandh me Dayanand-Rigbhashya ke chaturth se saptam(uplabdh) mandal tak ke nirvachanon ka vyakaran parak adhyayan kiya gaya hai.Bhumika me vedadhyayan ki parampara, Dayanand ki vedarth drishti tatha anukaran karne wale vidvanon ka sankshipt varnan hai. Sarvapratham Rajavachi Nirvachanon ka sankalan kiya gaya hai. Agrim adhyay me prashasanik va yauddhik nirvachan hain. Tatah Shodhprabandh me manaveeya nirvachan hain, jinme manavangvachi, tadgunvachi, sambandhvachi va charon aashramon se sambandhit nirdhanon ka vyakaranaadhyayanpoorvak grahan kiya gaya hai. Agrim adhyay me shiksha se sambandhit nirvachan hain, jinme pratham vidvadvachi nirvachan hai dwitiya adhyapak va adhyetaon se sambandhit nirvachan hain. Shodhprabandh me prakritik, darshanik tatha ishwarvachi nirvachan bhi griheet hain. Panchamahaabhut- parak nirvachan ek purna adhyaay me sthan diya hai. Antim adhyay me yatra tatra vikeern swalpmatra me prapt nirvachan vyakaranik adhyayansahit sankalit hain. Tatpashchat upasanhaar tatha parishisht, parishisht me do bhag hain ek me samast vyakhyat nirvachanon ki prishth-sankhya-samet soochi tatha dwiteeya me sandarbh-granth-soochi hai. Dayanand Saraswati ne vedarth ke liye vyakaran,nirukt,nighantu tatha brahman- granthon ki sahaayta li, unka vedbhashya swakalpit na hokar aarshsiddhantaanusari hai. Unka mantrarth sarvaangeen, sarvopayogi va hridayagraahi hone se manav-maatra ka hitaishi hai. newline